Sló óvænt í gegn á YouTube

Söngvari frá Suður-Kóreu hefur slegið í gegn á veraldarvefnum á síðustu vikum eftir að hann frumsýndi myndband við nýtt lag. Yfir 27 milljónir hafa horft á myndbandið á Youtube.com.

Söngvarinn er þekktur undir nafinu Psy og varð stórstjarna í heimalandinu í sumar með laginu Gangnam Style. Um miðjan júlí var lagið sett á Youtube.com og hefur notið gríðarlegra vinsælda. Fjölmiðlar um allan heim hafa skrifað um söngvarann, þar á meðal LA Times og Wall Street Journal.

Í síðustu viku var lagið vinsælasta myndbandið á Youtube, Facebook, Twitter, Vevo og Myspace. Fréttir herma að Psy hafi verið boðið að fara til Bandaríkjanna á næstu vikum og hitta framleiðendur Justin Biber.

Myndbandið þykir stórkostlega fyndið en Psy hefur verið söngvari í tíu ár við litlar undirtektir. Vinsældirnar koma honum mjög á óvart. „Ég átti ekki von á þessu. Auðvitað vonast ég til þess að fólki finnist lögin mín skemmtileg. Ég hef alltaf samið lög fyrir kóreskan markað og datt aldrei í hug að ég gæti vakið lukku í öðrum löndum," sagði hann í samtali við Wall Street Journal.

Myndbandið má sjá í meðfylgjandi myndskeiði. Stórskemmtilegt alveg!