Mackay: Mikill styrkur í Heiðari

Malky Mackay, knattspyrnustjóri Cardiff City segir að kaupin á íslenska landsliðsmanninum Heiðari Helgusyni séu mikill styrkur fyrir liðið og að Heiðar muni setja pressu á aðra framherja félagsins að standa sig.

„Við þurfum að fá samkeppni um stöður. Þú þarft að hafa leikmennina á tánum, vitandi það að aðrir leikmenn séu tilbúnir að taka stöðuna þeirra," sagði Mackay.

Heiðar spilaði virkilega vel fyrir QPR á síðustu leiktíð en hann skoraði níu mörk fyrir félagið, þrátt fyrir töluverð meiðsli á tímabilinu. QPR tókst að bjarga sér frá falli með naumindum úr úrvalsdeildinni í fyrra.

„Hann er mjög reyndur leikmaður og er það eitthvað sem við erum að leita að. Hann er líkamlega sterkur og er heilt yfir frábær atvinnumaður. Hann hefur einnig gott auga fyrir markaskorun og eru þetta allt eiginleikar sem heilla mig," sagði Mackay að lokum.