Rio Ferdinand ákærður af enska knattspyrnusambandinu

Rio Ferdinand, varnarmaður Manchester United, hefur verið ákærður af enska knattspyrnusambandinu fyrir ummæli á samskiptavefnum Twitter.

„Ferdinand er sakaður um að hafa skaðað ímynd knattspyrnunnar með ummælum þar sem kynþáttur, uppruni og/eða litarháttur komu við sögu," segir í tilkynningu frá enska knattspyrnusambandinu.

Rio Ferdinand er bróðir Anton Ferdinand sem taldi John Terry hafa haft kynþáttafordóma í frammi gagnvart sér í viðureign QPR og Chelsea í október síðastliðnum. Terry var sýknaður fyrir rétti en enska knattspyrnusambandið hefur síðan kært Terry fyrir sama brot. Terry neitar sök í málinu.

Það var einmitt eftir sýknun Terry fyrir rétti, þar sem Ashley Cole bar vitni, sem Rio Ferdinand lét ummælin falla. Þá kallaði hann Cole „choc-ice" sem almennt er notað yfir eitthvað sem er svart að utan en hvítt að innan.

Ferdinand hefur til 2. ágúst til þess að svara ákæru sambandsins.