Enginn Drogba á móti Manchester United?

Didier Drogba missir hugsanlega af leik Shanghai Shenhua og Manchester United á morgun vegna meiðsla en margir höfðu beðið spenntir eftir því að sjá Drogba glíma við United-vörnina með nýju kínversku liðsfélögunum sínum.

Didier Drogba yfirgaf Chelsea í vor og samdi við kínverska liðið. Hann hefur verið að glíma við bakmeiðsli að undanförnu og Sergio Batista þjálfari liðsins, efast um að hann verði orðinn nægilega góður fyrir leikinn. Drogba æfði ekki með liðinu sínu í dag.

„Ég get ekki fullyrt neitt á þessari stundu því hann er að glíma við eymsli í baki. Við munum sjá til á morgun," sagði argentínski þjálfarinn aðspurður um hvort Drogba yrði með.

Þetta verður þriðji leikur Manchester United á undirbúningstímabili sínu en liðið vann 1-0 sigur á AmaZulu og gerði 1-1 jafntefli við Ajax Cape Town. United mætir síðan Vålerenga, Barcelona og Hannover 96 í ágúst.