Gylfi Þór og félagar mæta La Galaxy í nótt

Gylfi Þór Sigurðsson og félagar hans í Tottenham Hotspur eru nú staddir í Bandaríkjunum þar sem þeir mæta LA Galaxy í æfingaleik í nótt. Gylfi verður væntanlega í byrjunarliði Tottenham í fyrsta sinn. Leikurinn fer fram í The Home Depot Center í Kaliforníu og hefst klukkan tvö að íslenskum tíma.

Það verður samt enginn David Beckham eða Landon Donovan í liði La Galaxy í nótt því þeir eru báðir uppteknir með Stjörnuliði MLS-deildarinnar sem mætir Evrópumeisturum Chelsea á morgun.

Gylfi Þór kom inn á sem varamaður í fyrsta æfingaleik undirbúningstímabilsins og skoraði þá fyrra mark liðsins í 2-0 sigri á Stevenage. Hann verður að öllum líkindum í byrjunarliði Andre Villas-Boas í kvöld.

Tottenham mætir einnig Liverpool og New York Red Bulls í æfingaferðinni til Bandaríkjanna en enska úrvalsdeildin hefst síðan með leik á móti Newcastle 18. ágúst næstkomandi.