Swansea tapaði fyrsta leiknum án Gylfa og Brendan Rodgers

Swansea City lék í nótt fyrsta leikinn sinn á undirbúningstímabilinu fyrir komandi tímabil í ensku úrvalsdeildinni en velska liðið er eitt af sex liðum úrvalsdeildarinnar sem eru stödd í æfingaferð í Bandaríkjunum.

Michael Laudrup var að stýra Swansea City í fyrsta sinn og þetta var fyrsti leikur liðsins eftir að Brendan Rodgers hætti sem stjóri liðsins og íslenski landsliðsmaðurinn Gylfi Þór Sigurðsson ákvað að semja við Tottenham.

Swansea liðið tapaði 1-2 fyrir Colorado Rapids í þessum leik þar sem bæði mörk bandaríska liðsins komu á fyrstu fimmtán mínútum leiksins. „Þetta voru tveir ólíkir hálfleikir hjá okkur. Við vorum í vandræðum í fyrri hálfleiknum og spiluðum þá alltof hægt," sagði Michael Laudrup sem skipti öllum tíu útispilurunum út í hálfleik.

Jonathan De Guzman, nýr leikmaður Swansea, náði síðan að minnka muninn í 2-1 á 79. mínútu leiksins. „Þetta var mikilvægur leikur fyrir mig að sjá alla leikmennina. Við erum hérna til þess að ég geti séð alla leikmennina í hópnum. Þess vegna spiluðu allir 45 mínútur og það verður eins í næsta leik," sagði Laudrup.