Swansea hafnaði fyrsta tilboði Liverpool í Joe Allen

BBC segir frá því að Liverpool og Swansea séu í viðræðum um kaup á miðjumanninum Joe Allen en þar kom líka fram að Swansea sé þegar búið að hafna einu tilboð frá Liverpool í leikmanninn. Brendan Rodgers þekkir Allen vel enda var hann áður stjóri Swansea.

Fyrsta tilboð Liverpool hljómaði upp á 10 milljónir punda plús það að fá Jonjo Shelvey á láni. Huw Jenkins, stjórnarformaður Swansea, hafnaði því strax.

Brendan Rodgers skrifaði undir tólf mánaða samning við Swansea, þegar hann hætti sem stjóri félagsins, um það að hann mætti ekki að reyna að ná í leikmenn liðsins. Swansea má þó selja honum leikmann ef það er talið hagstætt fyrir velska félagið.

Joe Allen er ekki með Swansea í æfingaferðinni til Bandaríkjanna því hann var valinn í Ólympíulið Breta og er þessa dagana að undirbúa sig fyrir leikana í London. Brendan Rodgers hefur hrósað Allen í viðtölum.

„Hann er mjög hæfileikaríkur leikmaður eins og allir vita. Það er samt aldrei einfalt að fá slíka leikmenn til félags eins og Liverpool," sagði Brendan Rodgers á dögunum.