Blatter varar Bale við - FIFA gæti dæmt hann í bann

Sepp Blatter, forseti FIFA, hefur varað Tottenham-manninn Gareth Bale við því að hann gæti átt á hættu að vera dæmdur í bann fyrir að gefa ekki kost á sér í Ólympíulið Breta.

Gareth Bale dróg sig út úr breska hópnum vegna meiðsla á baki en spilaði síðan með Tottenham á móti Los Angeles Galaxy í nótt þar sem hann skoraði eina mark liðsins eftir stoðsendingu frá Gylfa Þór Sigurðssyni.

Sepp Blatter ræddi mál Bale við fjölmiðla í dag og þar kom fram að FIFA gæti dæmt Bale í bann á meðan Ólympíuleikunum stendur en aðeins ef enska sambandið myndi leggja inn formlega kvörtun.

„Reglan er sú að ef lið sleppir ekki leikmanni í landsliðsverkefni þá getur sérsambandið leitað til FIFA og við getum sett hann á bann á meðan leikarnir eru í gangi," sagði Sepp Blatter.

Félög hafa hingað til komist upp með að leyfa ekki leikmönnum sínum að keppa á Ólympíuleikum en núna er komið skýrari stefna hjá FIFA og ljóst að landsliðin eru í fullum rétti að fá til sín þá leikmenn sem þau vilja að keppi fyrir þeirra hönd á leikunum.