Oscar til í að spila hvar sem er á vellinum hjá Chelsea

Brasilíumaðurinn Oscar, nýjasti meðlimur Evrópumeistaraliðs Chelsea, segist vera að til í að spila hvar sem er á vellinum hjá Chelsea eða bara sem að Roberto Di Matteo vill láta hann spila. Chelsea keypti kappann frá Internacional í vikunni en hann er þessa stundina á fullu með Ólympíuliði Brasilíumanna.

Það verður ekki auðvelt fyrir Oscar að komast í liðið hjá Chelsea því auk sterkra miðjuleikmanna sem voru hjá liðinu þá er Di Matteo einnig búinn að kaupa þá Eden Hazard og Marko Marin í sumar.

„Tilbðið var mjög gott og ég þurfti að hugsa mig um tvisvar. Eftir Ólympíuleikana ætla ég að tala við stjórann og fá að vita hvert hlutverk mitt verður í liðinu. Ég er klár í hvað það sem stjórinn vill að ég geri," sagði Oscar.

„Ég spilaði margar stöður hjá Internacional og það er ekkert vandamál hjá mér að aðlagast nýjum hlutverkum," sagði Oscar en besta staða hans er talin vera framarlega á miðjunni. Hann sýndi snilli sína með því að leggja upp tvö mörk í fyrsta leik Brasilíu á Ólympíuleikunum í London.

Oscar þekkir landa sína hjá Chelsea og segir að það hjálpi honum mikið. „Ég er góður vinur David Luiz og svo eru Ramires og Lucas Piazon einnig hjá liðinu og þetta mun hjálpa mér að aðlagast lífinu hjá Chelsea. Þetta er draumur að rætast fyrir mig og vonandi get ég unnið fleiri titla með Chelsea. Það eru mjög spennandi tímar framundan ekki síst þar sem félagið er að kaupa alla þessa ungu framtíðarleikmenn," sagði Oscar.