Wilshere spilar ekkert fyrr en í október

Endurkomu Jack Wilshere seinkar enn og nýjustu fréttir af stráknum eru þær að hann verði ekkert með Arsenal-liðinu fyrr en í fyrsta lagi í október. Wilshere missti af öllu síðasta tímabili og hefur hvað eftir annað orðið fyrir bakslagi í endurkomu sinni inn á fótboltavöllinn.

„Vonandi verður Wilshere farinn að spila í október og þar sem að Abou Diaby er líka að koma til baka þá er þetta eins og fá inn tvo nýja leikmenn. Hópurinn okkar verður sterkur á þessu tímabili," sagði Arsene Wenger, stjóri Arsenal.

Wilshere meiddist fyrst á ökkla en þurfti síðan að fara í hnéaðgerð í maí. Wenger og aðstoðarmenn hans ætla greinilega ekki að taka neina áhættu enda er allur ferill stráksins í húfi.

Wilshere sló í gegn tímabilið 2010 til 2011 en spilaði þá gríðarlega mikið og það bendir margt til þess að álagið hafi átt sinn þátt í meiðslunum. Hann er þó bara tvítugur og á því að eiga farsælan feril framundan.