Scholes: Kagawa er jafnfættur og erfitt að verjast gegn honum

Paul Scholes, leikmaður Manchester United, fer fögrum orðum um Shinji Kagawa sem United fékk frá Borussia Dortmund í sumar og telur að hann eigi eftir að njóta sín vel hjá Manchester United.

Kagawa er miðjumaður líkt og Scholes og stóð sig frábærlega hjá meistaraliði Dortmund í Þýskalandi á síðustu leiktíð.

„Kagawa er greinilega frábær leikmaður og mun nýtast liðinu vel. Hann hefur æft með okkur í nokkrar vikur núna og ég sé strax að þetta er leikmaður með mikinn leikskilning og hæfileikarnir eru svo sannarlega til staðar," sagði Paul Scholes.

„Ég sé fyrir að mér að Kagawa eigi bæði eftir að skora töluvert af mörkum og leggja upp mörg."

„Kagawa hefur það framyfir flesta fótboltamenn að hann er jafnfættur sem er mikill kostur, það er erfitt að verjast slíkum leikmanni."