Borini kominn til Liverpool | Maxi farinn

Liverpool er búið að ganga frá kaupum á ítalska framherjanum Fabio Borini. Hann kemur til félagsins frá AS Roma. Maxi Rodriguez er að sama skapi farinn frá félaginu.

Borini komst í gegnum læknisskoðun í dag og er búinn að skrifa undir langan samning. Hversu langan kemur ekki fram. Borini er fyrsti leikmaðurinn sem Brendan Rodgers kaupir til félagsins. Hann starfaði með leikmanninum er hann var yngri.

Leikmaðurinn er 21 árs gamall og þykir afar efnilegur. Hann var í ítalska landsliðshópnum á EM.

Argentínumaðurinn Maxi er búinn að semja við Newells Old Boys í heimalandinu. Hann kom til Liverpool í janúar árið 2010 frá Atletico Madrid. Hann lék 73 leiki fyrir Liverpool og skoraði 17 mörk.