Pearce ósáttur við skorður settar af enska knattspyrnusambandinu

Stuart Pearce, þjálfari Ólympíuliðs Breta í knattspyrnu, er ósáttur við að hafa ekki fengið að velja þá leikmenn Englands eru voru í landsliðshópnum á Evrópumótinu fyrr í sumar.

Ef frá er talinn markvörðurinn Jack Butland er enginn leikmaður Englands sem lék í Póllandi og Úkraínu í landsliðshópi Breta. Ekki er ólíklegt að Pearce, sem hafði áður sagst skilja ákvörðun enska knattspyrnusambandsins að leyfa ekki val á A-landsliðsmönnum Englendinga frá EM, hafi breytt um skoðun eftir að aðrar þjóðir tilkynntu landsliðshópa sína.

Javi Martínez, Jordi Alba og Juan Mata eru til að mynda allir í Ólympíuhópi Spánverja en þeir komu allir við sögu á Evrópumótinu í sumar.

„Þegar vinnuveitendur mínir biðja mig um skýrslu að leikunum loknum mun ég gera það ljóst að einn til tveir leikmenn sem ég gat ekki valið áttu heima hérna," er haft eftir Pearce í Guardian. Pearce vitnar í þátttöku sína á HM á Ítalíu 1990 og Evrópumótinu 1996 á Englandi sem hafi verið einstök upplifun.

Ensku landsliðsmennirnir Alex Oxlade-Chamberlain, Theo Walcott, Andy Carroll, Danny Welbeck og Jordon Henderson hefðu allir verið gjaldgengir í Ólympíuhópinn enda yngri en 23 ára. Enginn þeirra stóð Pearce til boða.

Hvert landslið má svo hafa þrjá eldri leikmenn. Einn þeirra er fyrirliðinn og Walesverjinn Ryan Giggs.

„Ég hef notið þess að vinna með Ryan Giggs, hlaupa á eftir honum og reyna að ná honum. Hann hefur setið fundi með þjálfurunum svo við höfum að því leyti leitað í smiðju hans og borið hluti undir hann. Það er eitthvað sem ég hef ekki áður gert með fyrirliða," er haft eftir Pearce.

Breska liðið mætir því brasilíska í æfingaleik á Riverside-leikvanginum í Middlesbrough á morgun.