Dzagoev með tilboð frá Tottenham

Faðir rússneska landsliðsmannsins Alan Dzagoev segir að kappinn sé með tilboð frá nokkrum félögum í Evrópu, þar á meðal Tottenham.

„Ég veit ekki hvort hann verði áfram hjá CSKA," sagði faðir hans í samtali við fjölmiðla í heimalandinu. „Það eru tilboð frá nokkrum félögum - þar á meðal Tottenham," bætti hann við.

Meðal annarra félaga sem Dzagoev hefur verið orðaður við eru til að mynda Arsenal, Chelsea og Real Madrid.

Dzagoev er 22 ára sókndjarfur miðvallarleikmaður og stóð sig vel með rússneska landsliðinu sem komst þó ekki upp úr sínum riðli í keppninni. Fullyrt er að Andre Villas-Boas muni taka við Tottenham síðar í vikunni og gæti vel verið að Dzagoev verði fyrstu kaup hans.

„Ég hef sagt honum að flýta sér ekki um of," sagði faðir Dzagoev. „Yuri Zhirkov fór til Chelsea í miklum flýti og sat lengi á bekknum."

Gylfi Þór Sigurðsson hefur einnig verið sterklega orðaður við Tottenham.