Rafael samdi við United til 2016

Brasilíski bakvörðurinn Rafael da Silva hefur skrifað undir nýjan fjögurra ára samning við Manchester United.

Da Silva kom til United fyrir fjórum árum síðan frá Fluminense í Brasilíu ásamt tvíburabróður sínum, Fabio. Þeir eru 21 árs gamlir en Rafael kom við sögu í átján leikjum með liðinu á síðastliðinu tímabili.

„Ég er afar ánægður með að skrifa undir nýjan samning," sagði hann. „Ég elska að spila fyrir Manchester United. Liðsandinn er frábær og ósvikin löngun til að ná árangri."

Knattspyrnustjórinn Sir Alex Ferguson lofaði Rafael. „Hann er einn sá efnilegasti hjá félaginu. Hann er algjörlega óttalaus og hefur mikla trú á sér. Hann hefur tekið miklum framförum síðan hann kom hingað fyrst."

Fabio verður lánaður til annars félags á næsta tímabili og verður það þá í fyrsta sinn sem tvíburarnir eru ekki samherjar.