Villas-Boas ráðinn til Tottenham

Andre Villas-Boas hefur verið ráðinn knattspyrnustjóri Tottenham en félagið tilkynnti það á Twitter-síðu sinni fyrir nokkrum mínútum síðan.

Villas-Boas var knattspyrnustjóri Chelsea í níu mánuði áður en hann var rekinn í mars síðastliðinum. Hann er aðeins 34 ára gamall en náði frábærum árangri með Porto í Portúgal áður en hann var ráðinn til Chelsea.

Talið er að Villas-Boas hafi skrifað undir þriggja ára samning við Tottenham sem ákvað að reka Harry Redknapp undir lok síðasta tímabils.

Gylfi Þór Sigurðsson hefur verið orðaður við Tottenham síðustu dagana en líklegt er talið að gengið verði frá hans málum á allra næstu dögum.