Aquilani æfir með Liverpool í sumar

Fátt virðist benda til annars en að Alberto Aquilani muni hefja undirbúningstímabilið með Liverpool, rétt eins og síðastliðið sumar.

Aquilani hefur síðustu tvö tímabil verið í láni hjá ítölskum félögum, nú síðast hjá AC Milan sem ákvað að kaupa hann ekki að tímabilinu loknu.

Aquilani skoraði eitt mark í 23 deildarleikjum með Milan og er nú framtíð hans í nokkurri óvissu. „Eins og er þá er Aquilani leikmaður Liverpool og mun æfa með liðinu í upphafi undirbúningstímabilsins," sagði umboðsmaður hans við fjölmiðla ytra.

„Nýi stjórinn (Brendan Rodgers) mun ákvað hvort hann vilji halda honum eða ekki. Ég hef ekki trú á því að hann komi aftur til Ítalíu og ég vona að Liverpool segi okkur fljótlega hvort félagið vilji halda honum eða ekki," sagði hann.

„Hann tognaði nýlega lítillega á ökkla en er annars í góðu standi."