Van Persie ætlar ekki að skrifa undir nýjan samning

Hollendingurinn Robin van Persie hefur tilkynnt forráðamönnum Arsenal að hann ætli ekki að skrifa undir nýjan samning við félagið.

Van Persie á eitt ár eftir af núverandi samningum við félagið og viðræður um nýjan samning höfðu gengið hægt.

Hann greindi frá því í yfirlýsingu sem birtist á heimasíðu hans að málið snerist ekki um peninga. Hann væri ekki sammála forráðamönnum félagsins um hvaða stefnu það ætti að taka.

Van Persie fundaði með Arsene Wenger, knattspyrnustjóra Arsenal og Ivan Gazidis, framkvæmdarstjóra félagsins.

„Ég vil ekki fara út í smáatriði en á þessum fundi varð mér ljóst að við erum að mörgu leyti ósammála um stefnu félagsins. Ég hef íhugað þetta vel og lengi en ég hef nú ákveðið að framlengja ekki samninginn minn,“ sagði hann.

Arsenal þarf nú að ákveða hvort félagið ætli að selja hann nú eða leyfa honum að fara frítt frá félaginu á næsta ári. Van Persie hefur verið orðaður við Manchester City, Paris St. Germain og Juventus.

Arsene Wenger, stjóri Arsenal, sagði í vikunni að hann ætlaði sér að halda Van Persie hjá félaginu, sama hvað það kostaði.

Van Persie sagði að mál hans myndu skýrast frekar þegar að Gazidis snýr aftur úr sumarfríi eftir um tvær vikur.