City að ganga frá nýjum samningi við Silva

David Silva segist ekki hafa áhuga á að fara til Real Madrid og að stutt sé í að hann skrifi undir nýjan samning við Englandsmeistara Manchester City.

Silva varð á dögunum Evrópumeistari með spænska landsliðinu og er nú í fríi en undirbúningstímabil ensku liðanna er að hefjast um þessa dagana.

Hann á enn tvö ár eftir af núverandi samningi sínum við City en þessi 26 ára gamli kappi hefur átt í viðræðum við félagið um nýjan samning, þó svo að hann hafi verið orðaður við Real Madrid í spænskum fjölmiðlum.

„Heimili mitt er hjá City og hér er ég fullkomnlega ánægður. Ég er ekki með hugann við Real Madrid heldur Manchester City," sagði Silva. „Ég er þakklátur fyrir þá reynslu sem ég hef öðlast hjá City og hef ég bætt mig mikið síðan ég kom hingað fyrst. Ég vissi ekki að ég myndi ná að spila svona þegar ég fór frá Valencia."

„Ég er í fríi eins og er en umboðsmenn mínir eru að semja um nýjan samning við City og er líklegt að þeim viðræðum muni ljúka innan mjög skamms tíma."

Robin van Persie, framherji Arsenal, hefur verið orðaður við City að undanförnu. „Félagið er að undirbúa tilboð í leikmenn til að styrkja leikmannahópinn. Þetta verður afar metnaðarfullt verkefni hjá félaginu."