Líklegt að marklínutækni verði notuð strax á næsta tímabili

Alex Horne, framkvæmdarstjóri enska knattspyrnusambandsins, segir það líklegt að marklínutækni verði notuð strax á næsta tímabili í ensku úrvalsdeildinni.

Í gær var samþykkt að innleiða tvö kerfi í knattspyrnulög, Hawk-Eye og GoalRef. Forráðamenn ensku úrvalsdeildarinnar munu nú fara í viðræður við framleiðendur kerfanna um að útvega félögum deildarinnar búnaðinn.

Vonir standa til að það verði hægt að ganga frá því fyrir janúar á næsta ári og að hægt verði að nota búnaðinn á seinni stigum tímabilsins.

Horne segir að Hawk-Eye sé þegar til staðar á Wembley-leikvanginum. „Það þarf að stilla það og sjá til þess að það virki rétt. En það er stutt í að við getum notað kerfið þar."

„Ég held til dæmis að það væri mjög eðlilegt að skoða það að nota kerfið í bæði undanúrslitum leikjum ensku bikarkeppninnar sem og úrslitaleiknum sjálfum."

„Mér heyrist á mönnum í ensku úrvalsdeildinni að þeir vilji innleiða kerfið. Kannski væri skynsamlegt að fara saman í viðræður og ná sameiginlegum samningum."