Rodgers vonar að Bellamy verði áfram

Brendan Rodgers vill að Craig Bellamy verði áfram í herbúðum Liverpool á næsta tímabili. Þeir ræddust við í upphafi vikunnar.

Samkvæmt enskum fjölmiðlum var óvíst hvort að Bellamy myndi vera áfram í Liverpool eftir að Kenny Dalglish var rekinn. Var hann sterklega orðaður við Cardiff City, þar sem hann lék sem lánsmaður frá Manchester City tímabilið 2010-2011.

„Þetta var virkilega gott spjall við Craig," sagði Rodgers við enska fjölmiðla. „Það var gott að hitta hann og heyra hans hlið málsins. Hann er mikill stuðningsmaður liðsins og elskar félagið."

„Hann hefur mikla ástríðu fyrir félaginu og ég vil vera með þannig leikmenn hér. Ég myndi gjarnan vilja halda honum hér og ég tel að það þyrfti eitthvað mjög sérstakt til að lokka hann annað."