Campbell skilur ákvörðun Van Persie

Sol Campbell, fyrrum landsliðsmaður Englands og leikmaður Arsenal, hefur fullan skilning á því að Robin van Persie hafi misst þolinmæði sína gagnvart félaginu.

Van Persie tilkynnti í vikunni að hann myndi ekki skrifa undir nýjan samning við Arsenal en núverandi samningur hans rennur út eftir eitt ár. Sagði hann þá að hann væri ekki sammála forráðamönnum Arsenal um framtíðarstefnu félagsins.

„Ég skil hann vel. Þegar maður mætir aftur til æfinga á nýju tímabili vill maður sjá ný andlit í búningsklefanum. Kannski leit Robin í kringum sig og velti því fyrir sér hvort þetta væri allt og sumt," sagði Campbell.

„Robin var hjá félaginu þegar við unnum titla og vill fá að upplifa það aftur. Það var greinilegt á yfirlýsingu hans að þolinmæði hans væri á þrotum og að hann geti ekki beðið að eilífu eftir því að vinna titla á ný."

„Kannski skrifar hann undir nýjan samning ef Arsenal nær að skrapa saman 100 milljónum punda og kaupa þrjá heimsklassa leikmenn. En félagið missti Fabregas og Nasri síðasta sumar og ég get ekki séð fram á miklar breytingar í sumar."