Zola ráðinn stjóri Watford

Gianfranco Zola hefur verið ráðinn knattspyrnustjóri Watford en ráðning hans hefur legið í loftinu alla vikuna. Hann gerði tveggja ára samning við félagið.

Watford leikur í ensku B-deildinni en félagið var keypt af Pozzo-fjölskyldunni fyrir skömmu en fjölskyldan á einnig Udinese á Ítalíu og Granada á Spáni. Nýju eigendurnir ákváðu að reka knattspyrnustjórann Sean Dyche fyrr í vikunni til að rýma fyrir Zola.

Zola stýrði West Ham frá 2008 til 2010 eftir að hafa verið ráðinn af þeim Björgólfi Guðmundssyni, þáverandi eiganda félagsins. Hann er þó ekki fyrsti Ítalinn sem stýrir Watford en Gianluca Valli gerði það tímabilið 2001 til 2002.