Wenger: Ég mun ekki breytast

Arsene Wenger, knattspyrnustjóri Arsenal, segist ekki ætla að breyta áherslum sínum á leikmannamarkaðnum í sumar, þrátt fyrir ósætti áhangenda liðsins.

Wenger hefur oftast einblínt á að fá unga og ódýra leikmenn til félagsins og neitað að borga of háar fjárhæðir fyrir eldri leikmenn og segist hann ætla að halda sig við þá stefnu.

Wenger segir að sigursælustu félögin séu byggð á ungum og góðum leikmönnum sem eru uppaldir hjá félaginu. Þar tekur hann sem dæmi Ajax og Barcelona en liðin hafa ávallt lagt mikla áherslu á unglingastarfsemi sem hefur skilað sér á endanum.

„Ég mun aldrei breytast. Ég mun reyna að fá unga leikmenn og fá þá til þess að toppa hjá félaginu," sagði Wenger.

„Eina slæma við þetta að stundum eyðileggst öll vinnan af annara völdum. Ég þekki það alltof vel enda missti ég Samir Nasri, Gael Clichy og Cesc Fabregas á aldri sem þeir ættu að vera að spila fyrir Arsenal á hápunkti ferils þeirra," bætti Wenger við.

„Þetta snýst um peninga hjá svo mörgum en ekki mér. Ég hefði getað farið frá klúbbnum oftar en tíu sinnum en ég hafði ekki áhuga á því. Ég er búinn að vera að í sextán ár í félaginu með sérstakar hugsjónir og áherslur sem ég tel að hafi gengið vel," sagði Arsene Wenger að lokum.