23 ára fyrrum Liverpool-maður lést úr krabbameini í gær

Miki Roque, 23 ára gamall varnarmaður Real Betis, lést í gær eftir baráttu við krabbamein. Hann var í herbúðum enska félagsins Liverpool á árunum 2005 til 2009.

Miki Roque náði aðeins að spila einn aðalleik með Liverpool en hann var á móti Galatasaray í Meistaradeildinni í desember 2006. Hann fór frá Liverpool til Real Betis fyrir þremur árum.

Miki Roque fór í aðgerð í fyrra til þess að fjarlægja æxli úr mjaðmargrind hans en krabbameinið hafði náð að breiðast út og fjölskylda hans tilkynnti það síðan í gær að Roque hefði tapað baráttunni.

Liverpool sendi í kjölfarið frá sér tilkynningu þar sem stóð að hugur allra hjá félaginu væri hjá fjölskyldu Miki Roque á þessari sorgarstundu.

Miki Roque verður minnst með einnar mínútu þögn fyrir undanúrslitaleik Spánverja og Portúgala á EM en hann fer fram á miðvikudagskvöldið.