Yakubu í samningaviðræðum við lið í Kína

Nígeríski framherjinn Yakubu er á förum frá Blackburn Rovers og mun spila í kínversku deildinni á næsta tímabili. Hann er kominn til Kína til að ganga frá samningum við Guangzhou R&F en félagið er nýkomið upp eftir eins árs dvöl í kínversku b-deildinni.

Yakubu stóð sig vel í ensku úrvalsdeildinni á síðustu leiktíð og skoraði alls 17 mörk í 30 leikjum. Yakubu er bara 29 ára gamall og á því nóg eftir í boltanum.

Yakubu tilkynnti það í vor eftir að Blackburn féll úr ensku úrvalsdeildinni að hann ætlaði ekki að spila í ensku b-deildinni. Hann skrifaði undir þriggja ára samning við Blackburn í ágúst 2011 en var með uppsagnarákvæði ef liðið félli úr ensku úrvalsdeildinni.

Það hefur ekki gefið út hversu mikið Yakubu fær í sinn hlut hjá kínverska félaginu en talið er að hann fái um 5,7 milljónir punda í árslaun eða um 1,1 milljarður íslenskra króna.

Yakubu fylgir því í fótspor tveggja annarra framherja í ensku úrvalsdeildinni sem hafa skellt sér í kínverska boltann en það eru þeir Nicolas Anelka og Didier Drogba. Anelka og Drogba spila báðir með Shanghai Shenhua.