Benitez: Englendingar hafa hæfileikana en ekki réttu heimspekina

Rafael Benitez, fyrrum stjóri Liverpool, hefur blandað sér í umræðuna um enska landsliðið sem féll út úr átta liða úrslitum Evrópumótsins á sunnudagskvöldið. Benitez segir að Englendingar þurfi að breyta fótboltaheimspeki sinni til þess að ná árangri á stórmótum.

Benitez skrifaði pistil í Independent-blaðið í morgun þar sem hann segir sínar skoðanir á því sem Englendingar þurfi að breyta til þess að vinna stórmót en enska landsliðið hefur ekki komist í gegnum átta liða úrslitin á HM eða EM síðan 1996.

„Enska sambandið er að reyna að breyta hlutunum en það er ekki að fela það að Englendingar eru enn langt frá því að búa til kerfi sem stuðlar að því að enskir landsliðsmenn geti keppt við þá bestu í Evrópu eða heiminum," skrifar Rafael Benitez.

Benitez gagnrýnir sérstaklega hvað tekur við hjá ungum leikmönnum þegar þeir verða 18 ára. Þá eru þeir oft ekki nógu góðir til þess að komast í aðalliðið og eru því sendir á láni í neðri deildarinnar þar sem er spilaður allt annar fótbolti.

Benitez segir mikilvægt að sama fótboltaheimspekin sé í gangi frá unglingaliðum upp í aðalliðin og að öll félögin í landinu þyrftu að koma sér saman um hvað sé best og halda sig síðan við það.

„Englendingar þurfa að horfa fram á veginn. Það verður ekki mikið vandamál að finna góða leikmenn því þeir eru út um allt. Það þarf hinsvegar að ræða það hvernig best sé að hjálpa þeim að vaxa og þroskast sem fótboltamenn," skrifar Benitez.

Það er hægt að lesa pistil Rafael Benitez með því að smella hér.