Owen í viðræðum við félag í Sádí-Arabíu

Michael Owen fær eins og kunnugt er ekki nýjan samning hjá Manchester United og nú lítur út fyrir að hann sé á förum frá Englandi. Owen er nefnilega í viðræðum við Al Shabab frá Sádí-Arabíu.

Michael Owen er bara 32 ára gamall en hefur verið mikið meiddur undanfarin tímabil og spilaði lítið sem ekkert með United á síðustu leiktíð.

Michael Owen skoraði 3 mörk í 4 leikjum í öllum keppnum í vetur og var alls með 17 mörk í 52 leikjum á þremur tímabilum sínum á Old Trafford.

Umboðsmaður Owen er nú í Dúbæ að ræða við forráðamenn Al Shabab en samkvæmt fréttum frá félaginu þá er stutt í að samningar náist.

Owen hefur auk þess leikið með Liverpool, Real Madrid og Newcastle United á sínum ferli og var enskur landsliðsmaður frá 1998 til 2008.