Capello gagnrýnir Rooney: Skilur hann bara skosku

Fabio Capello, fyrrum landsliðsþjálfari Englendinga og sá sem átti að stýra liðinu á EM, segist ekki skilja af hverju Wayne Rooney spilar bara vel fyrir Manchester United og sé ekki sami leikmaður þegar hann klæðist enska landsliðsbúningnum.

Capello var í viðtali við ítalska útvarpsstöð og tjáði sig þá um frammistöðu Rooney í leiknum á móti Ítalíu í átta liða úrslitum EM.

„Eftir að hafa horft á síðasta leik enska landsliðsins þá get ég ekki séð betur en að Rooney skilji bara skosku af því hann spilar bara vel í Manchester þar sem Sir Alex Ferguson talar skosku," sagði Fabio Capello og var hann örugglega með bros á vör.

Wayne Rooney skoraði 1 mark í 2 leikjum sínum á EM en hann tók út leikbann í fyrstu tveimur leikjunum. Rooney er aðeins með 4 mörk í síðustu 19 landsleikjum sínum en skoraði 34 mörk í 43 leikjum í öllum keppnum með Manchester United á síðasta tímabili.