Van Persie mun ræða við Arsenal þegar hann kemur úr fríinu

BBC hefur heimildir fyrir því að Robin Van Persie ætli að ræða við Arsenal um framtíð sína hjá félaginu þegar hann kemur til baka úr sumarfríi í byrjun júlí. Van Persie hefur verið í fríi síðan að hollenska landsliðið féll út keppni á EM fyrir tíu dögum síðan.

Robin Van Persie varð markakóngur ensku úrvalsdeildarinnar á síðasta tímabili en hann skoraði þá 30 mörk í 38 leikjum auk þess að leggja upp önnur 14 mörk fyrir félaga sína. Það er óhætt að segja að hann hafi haldið upp sóknarleik Arsenal-liðsins.

Van Persie á bara eftir eitt ár af samningi sínum við Arsenal og samkvæmt frétt BBC þá er hann alveg sáttur við að klára síðasta árið í samningnum og fara síðan á frjálsri sölu næsta sumar.

Arsenal hefur enn ekki gefið honum formlegt tilboð um nýjan samning en það má búast við að nýr samningur verði ræddur þegar Van Persie mætir til Lundúna í byrjun næsta mánaðar.

Van Persie hefur verið orðaður við mörg lið undanfarna mánuði og þá einkum lið Manchester City og Juventus en Arsene Wenger, stjóri Arsenal, ætlar að reyna allt til að halda þessum frábæra framherja.