Luka Modric: Ég fer frá Tottenham

Króatinn Luka Modric segir í viðtali við spænska blaðið Marca að hann sé á förum frá Tottenham en þessi snjalli miðjumaður hefur verið sterklega orðaður við spænsku meistarana í Real Madrid.

Luka Modric er 26 ára gamall og hefur spilað með Tottenham frá 2008 þegar hann kom þangað frá Dinamo Zagreb.

„Ég vil spila í Meistaradeildinni og í liðið sem getur unnið titla. Draumar mínar rætast ekki hér," sagði Luka Modric í viðtalinu í Marca.

The Sun slær því upp í morgun að Manchester United ætli að keppa við Real Madrid um Modric en kostar líklega meira en 30 milljónir punda.

Gylfi Þór Sigurðsson er hugsaður sem eftirmaður Luka Modric samkvæmt erlendum fjölmiðlum en það hefur þó ekki enn verið staðfest hvort íslenski landsliðsmaðurinn fari yfir höfuð til Spurs.