Sky Sports: Björn Bergmann nálgast Wolves

Fréttavefur Sky Sports staðhæfir í dag að Björn Bergmann Sigurðarson sé nálægt því að ganga til liðs við enska B-deildarfélagið Wolves.

Áður hefur verið greint frá því að Björn Bergmann sé líklega á leið til Wolves en nýráðinn stjóri liðsins, Norðmaðurinn Ståle Solbakken, hefur fylgst náið með Birni að undanförnu.

Björn Bergmann leikur með Lilleström í Noregi og hefur skorað ellefu mörk í þrettán leikjum með liðinu á núverandi leiktíð.

Samkvæmt Sky Sports munu forráðamenn Lilleström vera undir það búnir að missa Björn Bergmann í sumar og að viðræður við Wolves séu þegar hafnar. Enn fremur er fullyrt að Wolves vilji ganga sem fyrst frá samningum svo að hann freistist ekki til að fara eitthvert annað.