Kalou enn orðaður við Liverpool

Huub Stevens, stjóri þýska liðsins Schalke, er enn vongóður um að fá Salomon Kalou í sínar raðir en segir að mörg lið hafi áhuga, þeirra á meðal Liverpool.

Kalou hefur spilað með Chelsea undanfarin ár en félagið ákvað að endurnýja ekki samning hans og er honum því frjálst að finna sér nýtt félag í sumar.

„Það eru mörg félög sem vilja fá hann. Liverpool, til dæmis. En ég veit fyrir víst að hann vill komast frá Englandi og þetta gæti því verið gott tækifæri fyrir okkur," sagði Stevens við Daily Mirror í dag.

Kalou gæti fyllt í skarðið sem Dirk Kuyt hefur skilið eftir sig hjá Liverpool.