Kagawa: Bara læknisskoðunin eftir

Japanski miðjumaðurinn Shinji Kagawa segir að það sé nánast frágengið að hann muni ganga til liðs við Manchester United í sumar.

Kagawa ræddi við fjölmiðla eftir leik japanska landsliðsins gegn Ástralíu í gær en honum lauk með 1-1 jafntefli.

„Ég á eftir að fara í læknisskoðun en samkomulag á milli mín og félagsins er nánast tilbúið," sagði hann í samtali við japanska fréttamenn.

„Manchester United sendi mér tilboð og ég er búinn að ræða við Alex Ferguson. Ég mun nú ræða við umboðsmann minn og ákveða næsta skref. Þá verður opinber tilkynning birt."

„Ég íhugaði þetta vel og lengi en ákvað að ég þyrfti á áskorun að halda," bætti hann við.