Roberto Di Matteo ráðinn til tveggja ára

Roberto Di Matteo hefur verið ráðinn knattspyrnustjóri enska úrvalsdeildarfélagsins Chelsea. Di Matteo tók við liðinu tímabundið eftir bottvikningu André Villas-Boas á síðustu leiktíð.

„Ég er skiljanlega í skýjunum að hafa verið ráðinn knattspyrnustjóri. Við náðum ótrúlegum árangri á síðustu leiktíð og skráðum okkur í sögubækur félagsins. Markmið okkar er að byggja á þessum árangri og ég hlakka nú þegar til að taka á móti leikmönnunum þegar undirbúningstímabilið fer í hönd," segir Di Matteo á vef Chelsea.

Undir stjórn Ítalans varð algjör breyting á gengi Lundúnarliðsins. Tímabil sem virtist ætla að verða tímabil mikilla vonbrigða endaði á besta mögulega hátt er liðið vann Meistaradeild Evrópu. Áður hafði liðið unnið enska bikarinn.