Hermt að Redknapp sé á förum frá Spurs

Þrátt fyrir yfirlýsingar um annað þá virðist vera að Harry Redknapp sé að hætta sem stjóri Spurs. Ástæðan er ágreiningur um lengd samnings.

Redknapp á aðeins eitt ár eftir af samningi sínum við Spurs og vill lengri samning sem félagið er ekki til í að bjóða honum. Það ku vera stál í stál í viðræðunum.

"Það er í höndum Tottenham hvort þeir framlengi samninginn við mig eður ei. Það verður alls ekki auðvelt fyrir leikmennina að fara inn í tímabilið vitandi að þjálfarinn sé að fara að hætta," sagði Redknapp sem gæti hreinlega hætt strax í sumar vegna málsins.

"Þetta snýst ekki um að ég sé að leita að öryggi heldur um leikmennina. Maður leyfir leikmönnum ekki að eiga eitt ár eftir af samningi ef manni finnst þeir vera góðir. Það sama á við um stjórana. Ef Spurs finnst ég ekki vera þess virði er lítið sem ég get gert við því."