Ramires ánægður með ákvörðun Chelsea

Brasilíumaðurinn Ramires segir að það hafi verið rétt ákvörðun hjá eiganda Chelsea að gera tveggja ára samning við knattspyrnustjórann Roberto Di Matteo.

Di Matteo tók við tímabundið eftir að Andre-Villas Boas var rekinn í mars síðastliðnum. Di Matteo nýtti tækifærið vel, vann bæði Meistaradeild Evrópu og ensku bikarkeppnina.

„Stjórn Chelsea tók rétta ákvörðun. Það hefði verið áhættusamt að gera eitthvað annað," sagði Ramires í samtali við fjölmiðla í heimalandinu.

„Nýr stjóri hefði þurft aðlögunartíma og það hefði verið óvíst að sjá fyrir hvernig það myndi ganga. Di Matteo náði að koma sínu í gegn og vann svo bestu félagsliðakeppni heims."

„Það hlýtur því að teljast eðlilegt að hann teljist vera einn mikilvægasti knattspyrnustjóri heims í dag."