Villas-Boas sagður vera efstur á óskalista Spurs

Enskir fjölmiðlar eru eðlilega farnir að velta því fyrir sér hver muni taka við af Harry Redknapp sem knattspyrnustjóri Tottenham. Andre Villas-Boas er sagður vera efstur á óskalista félagsins.

Villas-Boas er án félags eftir að hafa verið rekinn frá Chelsea á síðustu leiktíð. Hann náði engum árangri hjá félaginu og náði ekki að ávinna sér traust leikmanna þar á bæ.

Engu að síður hafa nágrannarnir í Tottenham trú á því að Villas-Boas muni henta þeirra liði vel.

David Moyes, stjóri Everton, og Roberto Martinez, stjóri Wigan, eru einnig sagðir vera undir smásjánni hjá Spurs. Nafn Jürgen Klinsmann hefur einnig heyrst.