Arsenal ætlar að kaupa Giroud frá Montpellier

BBC segir frá því í kvöld að Arsenal sé langt komið með því að ganga frá kaupum á franska landsliðsmanninum Olivier Giroud og muni borga 12 milljónir punda fyrir framherja Frakklandsmeistara Montpellier.

Arsene Wenger ætlar að mynda þriggja manna framlínu með þeim Olivier Giroud, Lukas Podolski og svo Robin van Persie. Giroud er á leiðinni í læknisskoðun og mun síðan ganga frá öllum pappírum eftir EM.

Giroud hefur þotið upp metorðastigann en hann var að spila í frönsku b-deildinni fyrir tveimur árum og lék ekki sinn fyrsta landsleik fyrr en í nóvember síðastliðinn. Hann hefur skorað 1 mark í 6 landsleikjum en átti tvær stoðsendingar í sigri Frakka á Íslendingum skömmu fyrir EM.

Olivier Giroud er 192 sm á hæð og verður 26 ára gamall í lok september. Hann var með 21 mark og 9 stoðsendingar í 36 leikjum með Montpellier á þessu tímabili. Hann var með 12 mörk og 2 stoðsendingar í 37 leikjum tímabilið á undan en lék 2009-2010 með Tours-liðinu í frönsku b-deildinni.