Eden Hazard: Hvers vegna ekki Chelsea?

Knattspyrnumaðurinn Eden Hazard, nýjasti liðsmaður enska úrvalsdeildarfélagsins Chelsea, segir að eftir sigur Chelsea í Meistaradeild Evrópu hafi hann hugsað með sér: „Hvers vegna ekki Chelsea?"

Hazard sagði í viðtali við franska fjölmiðilinn RMC að sú staðreynd að Chelsea hefði tryggt sér sæti í Meistaradeild Evrópu með sigrinum á FC Bayern í úrslitaleiknum hefði skipt sköpum í ákvarðanatöku hans um nýtt félag.

„Liðið var í sjötta sæti og hefði því ekki spilað í Meistaradeildinni á næstu leiktíð. Ég vil spila í keppninni á hverju ári," segir Belginn sem segir valið aðallega hafa staðið á milli Chelsea og Manchester United.

„Ég hef alltaf sagt að ég vildi spila á Englandi. Valið stóð á milli Chelsea og Manchester United en að mínu mati er staða mála best hjá Chelsea. Liðið er ungt og ég hef meiri möguleika á að fá að spila þar. Þar sem ég er aðeins 21 árs hefði verið erfitt að komast að hjá Real Madrid og Barcelona. Spili ég vel hjá Chelsea gæti ég komist í byrjunarliðið," segir Hazard sem er feginn að hafa gengið frá samningi við Chelsea fyrir sumarfrí.

„Mér líður frábærlega. Nú vita allir hvar ég mun spila. Ég vildi geta farið afslappaður í sumarfrí. Ég ætla að njóta þess og koma eins sterkur til leiks á næsta tímabili og mögulegt er."