Biglia: Arsenal og Real Madrid hafa verið í sambandi

Argentínski miðjumaðurinn Lucas Biglia, fyrirliði Anderlech, segist hafa rætt við forráðamenn Arsenal og Real Madrid um möguleg vistaskipti.

„Real Madrid og Arsenal hafa bæði verið í sambandi," er haft orðrétt eftir Biglia í The Sun á Englandi. Biglia er 26 ára djúpur miðjumaður og á að baki sex landsleiki fyrir hönd Argentínu.

„Ég er samningsbundinn Anderlecht til 2015 en forráðamenn félagsins vita að ég hef hug á því að yfirgefa félagið," segir Biglia og bætir við að fái belgíska félagið viðunandi tilboð megi hann fara.

Biglia hefur verið orðaður við liðin tvö í þónokkurn tíma og þetta er ekki í fyrsta skipti sem hann tjáir sig um evrópsku félögin tvö. Hvorugt félagið hefur þó gert tilboð í Argentínumanninn til þessa.

Fiorentina á Ítalíu gerði tilboð í kappann í janúar síðastliðnum en belgíska félagið hafnaði því tilboði.