Rio búinn að afskrifa 100. landsleikinn

Rio Ferdinand, miðvörður Manchester United, fékk ekki að fara með enska landsliðinu á EM og þessi 33 ára gamli leikmaður viðurkenndi það í viðtali við The Sun að landsliðsferillinn væri líklega á enda. Ferdinand hefur spilað 81 landsleik frá árinu 1997 og lét sig dreyma um að spila hundrað landsleiki.

„Það er vel hægt að segja að landsliðsferillinn sé á enda. Ef ég er valinn núna ekki síst þegar svona margir eru meiddir þá er ólíklegt að ég verði valinn aftur," sagði Rio Ferdinand.

Roy Hodgson valdi Rio ekki í upprunalega hópinn sinn og tók hann ekki heldur inn þegar Gary Cahill meiddist. Margir telja að það sé vegna slæms sambands á milli Rio og John Terry en Terry er á leiðinni í réttarsal seinna í sumar fyrir meint kynþáttaníð gagnvart yngri bróður Rio, Anton Ferdinand.

„Ég hef alltaf sagt það að ég myndi ekki leggja landsliðskónna á hilluna fyrr en ég hætti að spila og það hefur ekki breyst. Ég mun alltaf gefa kost á mér. Ég var að vonast eftir því að ná því að spila hundrað leiki en vegna ýmissa ástæðna þá hefur það ekki gerst," sagði Rio Ferdinand en hann hefur verið mikið meiddur síðustu ár og missti meðal annars af HM 2010 eftir að hafa meiðst rétt fyrir mótið.

„Auðvitað er ég ósáttur með að vera ekki í landsliðinu og það eru bara eðlileg viðbrögð. Ég ætla samt ekki að ræða hvað fór á milli mín og Herra Hodgson en hann veit að ég vildi vera með," sagði Ferdinand.