Brendan Rodgers verður næsti stjóri Liverpool

Brendan Rodgers, stjóri Swansea, verður næsti stjóri Liverpool en hann hefur skrifað undir þriggja ára samning við Liverpool samkvæmt frétt á BBC. Liverpool mun væntanlega staðfesta ráðninguna á næstu 24 tímum.

Liverpool kaupir upp samning Rodgers við Swansea og þarf að borga velska félaginu á bilinu 4 til 5 milljónir punda til að fá Rodgers lausann. Liverpool hefur verið stjóralaust síðan að Kenny Dalglish var rekinn 16. maí síðastliðinn og fyrir aðeins tólf dögum hafnaði Rodgers viðræðum við Liverpool.

Liverpool var 17 stigum frá því að ná Meistaradeildarsæti á þessu tímabili en liðið vann enska deildarbikarinn og komst í enska bikarúrslitaleikinn þar sem liðið tapaði á móti Chelsea. Síðasti leikur Dalglish með Liverpool-liðið var einmitt á móti Swansea þar sem Brendan Rodgers stýrði sínum mönnum til 1-0 sigurs.

Brendan Rodgers gerði frábæra hluti með nýliða Swansea á nýloknu tímabili en félagið spilaði frábæran fótbolta og náði 11. sæti í ensku úrvalsdeildinni. Brendan Rodgers stýrði áður Watford og Reading en var búinn að stýra Swansea síðan í júlí 2010.

Swansea keypti nýverið íslenska landsliðsmanninn Gylfa Þór Sigurðsson frá Hoffenheim en Gylfi kom til Swansea á láni í janúar ekki síst vegna þess að Gylfi þekkti Rodgers vel og lék fyrir hann hjá Reading á sínum tíma.