Ferill Brendan Rodgers í máli og myndum

BBC hefur tekið saman tæplega tveggja mínútna myndband um ferillinn hjá Brendan Rodgers sem í dag skrifaði undir þriggja ára samning um að gerast næsti stjóri Liverpool. Rodgers tekur við af Kenny Dalglish sem var rekinn frá félaginu á dögunum.

Brendan Rodgers er 39 ára Norður-Íri sem hefur starfað sem þjálfari í 17 ár. Hann fékk á sínum tíma tækifæri til að þjálfa unglingalið og seinna varalið Chelsea þegar José Mourinho var stjóri Chelsea en reyndi fyrst fyrir sér sem stjóri hjá Watford tímabilið 2008-2009.

Brendan Rodgers sló í gegn sem stjóri Swansea City sem vakti mikla athygli á sínum fyrsta tímabili í ensku úrvalsdeildinni, náði 11. sætinu og náði sem dæmi í fjögur stig í tveimur leikjum á moti Liverpool.

Það má sjá samantekt BBC á ferli Brendan Rodgers með því að smella hér en þar hrósar Harry Redknapp, stjóri Tottenham, meðal annars Brendan Rodgers fyrir hvernig fótbolta liðin hans spila.