Lampard ekki með á EM | Henderson inn

Roy Hodgson, landsliðsþjálfari Englands, hefur nú staðfest að Frank Lampard muni ekki spila með enska landsliðniu á EM í sumar vegna meiðsla.

England hefur nú misst tvo miðjumenn með skömmu millibili en Gareth Barry neyddist til að draga sig úr hópnum eftir að hann meiddist í vináttulandsleiknum gegn Noregi um helgina.

Lampard meiddist á æfingu í gær og hafa læknisrannsóknir nú leitt í ljós að hann muni ekki ná sér áður en EM hefst í næstu viku. Hodgson hefur kallað Liverpool-manninn Jordan Henderson í landsliðið í hans stað.

„Þetta er mikið áfall fyrir liðið, sérstaklega svo skömmu eftir að við misstum Gareth Barry," sagði Hodgson. „Staðreyndin er sú að læknir liðsins getur ekki tryggt að Frank geti spilað með í riðlakeppninni og því verðum við að kalla á nýjan mann á miðjuna hjá okkur."

„Þetta eru sérstaklega mikil vonbrigði fyrir Frank sjálfan. Hann hefur verið í góðu formi og hlakkaði til mótsins."

Lampard hefur þó sagt að hann ætli sér ekki að hætta spila með landsliðinu á næstunni.