Torres: Mestu vonbrigði lífs míns

Fernando Torres hefur óskað eftir viðræðum við forráðamenn Chelsea um framtíð hans hjá félaginu. Hann segir að hafi verið erfitt að kyngja því að vera ekki í byrjunarliði Chelsea í úrslitaleik Meistaradeildar Evrópu.

Chelsea varð Evrópumeistari eftir sigur á Bayern München í úrslitaleiknum. Torres kom inn á sem varamaður en Chelsea hafði betur í vítaspyrnukeppni. Torres var ekki einn þeirra sem tók víti fyrir Chelsea.

„Mér fannst þetta mótsagnakennt enda finnst mér ég vera á hátindi ferilsins. Það er langt síðan ég hef verið jafn hungraður. En ég varð að sætta mig við að vera á bekknum. Þegar ég sá byrjunarliðið þá fann ég fyrir miklum vonbrigðum - líklega meiri vonbrigðum en nokkru sinni áður í mínu lífi," sagði Torres.

„Ég hélt að ég myndi spila í leiknum og gat ekki ímyndað mér annað. En ég fékk þó að taka þátt á endanum og gera mitt fyrir liðið. Ég er mjög ánægður."

Torres náði sér sjaldan almennilega á strik á nýliðnu tímabili og hann segist hafa óskað eftir viðræðum um framhaldið.

„Ég hef upplifað ýmislegt á þessu tímabili sem ég hef ekki upplifað áður. Það kom mér á óvart hvernig komið var fram við mig. Það var ekki í samræmi við það sem var rætt þegar ég samdi við félagið."

„Við höfum þegar rætt mikið saman og við munum gera það áfram. Ég vil að þeir segi mér hvað framtíð mín ber í skauti sér. Fótboltinn verður að vera sanngjarn."

„Ég hef gengið í gegnum erfiða tíma - þá verstu á mínum ferli. Ég vil ekki upplifa annað eins aftur. En ég verð að eilífu þakklátur fjölskyldu minni sem hefur staðið mér vil hlið."