Suarez: Hef ekki rætt við Barca eða Real

Luis Suarez hefur gert lítið úr þeim sögusögnum að hann sé á leið í spænsku úrvalsdeildina nú í sumar.

Suarez átti skrautlegt tímabil hjá Liverpool í ensku úrvalsdeildinni þar sem deila hans við Patrice Evra, leikmann Manchester United, bar hæst.

Hann viðurkennir að hann geti ímyndað sér að spila á Spáni síðar en að ekkert sé hæft í orðrómum þess efnis að hann hafi þegar átt í viðræðum við Barcelona og Real Madrid.

„Ég hef aldrei rætt við neinn frá þessum félögum. Ef eitthvað væri til í þessum sögusögnum þá væri ég nú þegar búinn að spila með 20 liðum," sagði Suarez.

„Liverpool átti gott tímabil. Við komumst í tvo bikarúrslitaleiki. við hefðum viljað enda ofar í úrvalsdeildinni en liðið hefur tekið jákvæð skref í rétta átt."

„Liverpool fær hæstu einkunn fyrir þann stuðning sem áhorfendur og stuðningsmenn veita leikmönnum. Ég er afar þakklátur félaginu fyrir að gefa mér tækifæri til að spila í ensku úrvalsdeildinni."

Kenny Dalglish var í síðustu viku rekinn sem knattspyrnustjóri liðsins og leitar félagið nú að nýjum knattspyrnustjóra.