Berbatov: Ferguson sveik loforð

Dimitar Berbatov segir að hann eigi ekki annarra kosta völ en að yfirgefa herbúðir Manchester United í sumar.

Berbatov var í byrjunarliði United í aðeins fimm deildarleikjum á tímabilinu og segir hann að það hafi verið þvert á loforð knattspyrnustjórans Alex Ferguson.

„Við ræddum tíu sinnum saman og alltaf sagði hann mér að það væri pláss fyrir mig í liðinu. En ég fór alltaf á bekkinn," sagði Berbatov í viðtali við The Sun í dag.

„Tími minn hjá United er að renna út. Mér finnst að ég sé ekki lengur mikilvægur hluti af liðinu. Mér fannst ég fara vel með þau tækifæri sem ég fékk og tel að ég hafi átt betra skilið."

„Það er ljóst að ég er að fara frá United. Ég er að leita mér að nýju félagi. Ég veit að ég get enn spilað toppfótbolta."