Abramovich íhugar að gefa Di Matteo eitt ár

Roman Abramovich, eigandi Chelsea, er sagður nú vera að íhuga hvort hann eigi að ráða Roberto Di Matteo til að stýra liðinu á næstu leiktíð.

Di Matteo var fenginn í starf knattspyrnustjóra á miðju tímabili eftir Andre Villas-Boas var rekinn í byrjun mars. Di Matteo hafði starfað sem aðstoðarmaður hans en eftir að hann tók við taumunum gekk Chelsea allt í haginn.

Liðið varð bæði Evrópumeistari sem og enskur bikarmeistari. Liðið leikur því í Meistaradeild Evrópu á næstu leiktíð þrátt fyrir að hafa endað í sjötta sæti ensku úrvalsdeildarinnar.

Enska dagblaðið The Times fullyrðir í dag að Abramovich sé þrátt fyrir allt efins um að Di Matteo sé rétti maðurinn til að byggja upp nýtt lið hjá félaginu.

Það er þó ekki líklegt að Abramovich muni ákveða sig fyrr en í næstu viku, að sögn The Times.