Heargreaves fer frá City

Owen Hargreaves er í hópi þeirra leikmanna sem fá ekki nýjan samning hjá Englandsmeisturum Manchester City í sumar.

Hargreaves kom til City í ágúst síðastliðnum en þá var hann án félags. Hann spilaði aðeins fjóra leiki með City en náði að skora eitt mark - í leik gegn Birmingham í enska deildabikarnum.

Hargreaves hefur átt erfitt uppdráttar vegna meiðsla síðustu árin en hann lék áður með Bayern München og Manchester United. Hann spilaði mikið á sinni fyrstu leiktíð með United, frá 2007 til 2008, en spilaði aðeins fimm leiki síðustu þrjú tímabilin sín með liðinu.

Óvíst er hvað hann tekur sér fyrir hendur en ekki er víst að mörg félög vilji taka þá áhættu að semja við hann.

Aðrir leikmenn sem eru á förum fra City eru minna þekktir. Meðal þeirra má nefna Ahmed Benaly, Gai Assulin og Sean Tse.